旅行般的學習體驗,踏進好奇與改變之路

 - Olivia (義遊高級項目經理)
 「我喺義遊做咗超過七年喇,係做得最耐嘅員工!我哋嘅工作係喺海外同埋香港策劃義工項目。我會統籌海外嘅義工項目同埋策劃體驗活動去啟發參加者突破自己嘅框框,同社會上唔同嘅人交流。我仲記得自己大學一年級嗰陣,第一次自己義遊旅行。我同一班來自世界各地嘅學生去咗韓國做義工。嗰次經歷真係改變咗我。

除咗接觸到好多來自唔同文化背景嘅人,嗰次旅程仲令我大開眼界,發現個世界有好多嘢值得去見識,我就喺嗰時開始愛上咗旅行!透過義遊嘅義工項目,我哋希望啟發年青人去嘗試解決國際同埋本地嘅問題,用唔同嘅角度去睇事物。呢度亦都係我親身體驗到同理心價值嘅地方。有時當我哋去到一個唔熟悉嘅環境,可能會覺得有啲嘢對我哋嚟講係好有『問題』,但係對當地人嚟講,呢啲可能根本唔係最迫切嘅問題。真正嘅同理心就係要從對方嘅角度睇到佢哋真正面對嘅問題,然後提供相應嘅支援俾佢哋。」
「大學畢業之後,我去咗歐洲旅行一個月, 探我第一次義遊認識嘅朋友,去過奧地利、德國、捷克……我同一個本地家庭住喺阿爾卑斯山嘅山腳,完全投入喺當地文化入面。之後我以互惠生嘅身份喺法國住咗一段時間,嗰時一句法文都唔識講㗎 !我心入面一直記掛住呢啲貼近當地文化嘅體驗,所以當我見到義遊請人,我就知道呢個崗位會好適合我。我係一個鍾意探險嘅人,又鍾意認識新朋友。我亦都想做一啲活躍、實幹同埋有意義嘅工作。喺義遊呢度,我哋經常鼓勵參加者去發掘三樣嘢:好奇心、同理心同埋求變心。你首先要願意學習,對他人有同理心,先會做到積極嘅改變。工作最有滿足感嘅部份,就係見到參加者因為我哋嘅計劃而有所成長。呢啲經歷可以擴闊佢哋嘅眼界,透過旅行,令佢哋發現有無窮無盡嘅可能性去學習、認識同埋同其他人交流。我自己親身經歷過有幾正,所以好想將呢樣嘢同其他人分享!」
「喺疫情之前,我每隔幾個月就要去外地出差, 不過依家義遊嘅活動都係本地為主。以前我要同當地嘅合作夥伴一齊策劃最好嘅體驗俾參加者,所以咁多年來,我喺世界唔同角落都識咗好多好朋友。有時都幾難受㗎,因為我哋會喺短短幾星期建立咗好深刻嘅感情,但最終都係要同對方講再見。

透過呢啲合作,我發現就算大家語言不通都好,總會有方法可以同對方交流同埋溝通。我自己嘅配方就會係一個大大嘅笑容、身體語言同埋Google翻譯。有一個柬埔寨嘅合作夥伴同我成為咗好朋友,佢甚至搵我做佢婚禮嘅伴娘添呀!當我唔係去緊旅行嘅時候,我其實有啲宅,鍾意喺屋企休息,不過我都鍾意行吓山、露營、睇書同埋睇電影㗎。我最近同自己有個約定,要每個月學習一樣新嘅技能,上個月學咗畫唐卡畫,今個月會學插花。 一個多姿多彩嘅人生就係要不斷有新嘅體驗嘛!」


(原文刊於:
陳廷驊基金會 X Hong Kong Shifts網頁)
「慈之以行」計劃由陳廷驊基金會 X Hong Kong Shifts 籌辦,希望表揚一班於疫情中默默耕耘嘅 NGO同工,大家記得留意充滿慈悲、毅力、正能量嘅感人故事。⁣